تستمر الفنانة نهى صالح، بالمطالبة بحق شقيقها الراحل في حادث مروري مروع، يوم الجمعة الماضية، وحرصت على توجيه رسالة لمصور الحادث وسائق السيارة الملاكي، عبر حسابها الرسمي على موقع التواصل الاجتماعي “فيسبوك”.
ونشرت نهى صالح، مقطع فيديو الحادث، وعلقت عليه قائلة: “لكل واحد دافع عن العربيه بكل ظلم وغلط أخويا وهو مش حاسس بينا الفيديو أهو”.
وتابعت نهى صالح، قائلة: “كانوا ماشيين على طريق سريع وقدامهم عربيه ماشيه على الشمال وهما كانوا يمين وفوقهم كاميرا يعنى مش ماشيين بسرعه لإن ماشين بسرعه الرادار وابتدوا يناموا على التانك بتاع البايك وهدى السرعه بعد الرادار علشان ينطلق”.
وأضافت نهى صالح، قائلة: “ففجاءه سواق العربيه قرر يدى إشاره يمين ويهدى مره واحده علشان يجى من رابع حاره كان ماشى فيها لأول حاره وأول مفرق على أيده اليمين لإنه كان عايز ياخدها بالعرض فهما اتخضوا يا حبايب قلبى منه فخبطوا فى بعض قدام عين العربيه فعمل أيه السواق فكمل طريقه عادى ولا كأنه عمل حاجه، ما تهزش لحظه للبايك وهى ماسكه فيه النار كمل بكل جحود ولا كأن حصل حاجه جنبه فيها أرواح ونار”.
وأكملت نهى صالح، قائلة: “أحب أقول للسواق إن مش ذنبهم بس إلى فى رقبتك ذنب عياله كمان لإنهم شافوا الحادثه بعينيهم وشافوا أبوهم بعنيهم وهو بيموت وأنت مكمل عادى ده بالنسبالك”.
نهى صالح: إزاى فضلت ماسك التليفون والنار مولعه
وأردفت نهى صالح، قائلة: “أما بالنسبه للى صور فده مش لاقيه كلام أوصفك بيه إزاى قدرت يا عديم الإنسانيه إنك تصور حتى بعد الحادثه بدقيقه وكملت برضه طريقك عادى، إزاى فضلت ماسك التليفون والنار مولعه فى الموتسكلات كل ده علشان عايز تلحق تنزل الفيديو علشان الايك والشير والفيو”.
واستكملت نهى صالح، قائلة: “طيب أحب أقولك إن عيال أخويا اللى شافوا الحادثه بعنيهم كانوا ممكن يتخطوا مع الزمن بس الفيديو اللى حضرتك صورته بيفتحوه كل شويه علشان يشوفوه فذنبك كبير عند ربك يا عديم الدين والإنسانيه، فوضت أمرى لله هو حسبى ووكيلى”.
واختتمت نهى صالح، قائلة: “أنا عايزه حق أخويا وأنس من اللى قهر قلبى عليه، العربيه واللى صور الفيديو حتى بعد الحادثه وشاف النار حتى ماساعدهمش لازم يتحاسبوا دمرونى ودمروا عياله ومراته وحياتنا كلها، مش هسيب حق أخويا”.