روى الدكتور يوسف بطرس غالي، وزير المالية الأسبق، للمرة الأولى تفاصيل الأيام الأخيرة قبل تنحي الرئيس الأسبق حسني مبارك، وكشف كواليس آخر مكالمة جمعته به، بالإضافة إلى العرض الذي تلقاه لتولي حقيبة وزارة المالية في حكومة الدكتور أحمد شفيق.
وقال غالي خلال لقائه في بودكاست “موعد مع لميس”، الذي تقدمه الإعلامية لميس الحديدي، ردًا على سؤالها: “إمتى آخر مرة كلمت الرئيس مبارك قبل ما تسافر؟”، إن آخر مكالمة كانت يوم السبت 29 يناير، موضحًا: “كان أحمد شفيق قالي تيجي وزير مالية.. قولتله لأ”.
وعن سبب رفضه، قال: “قولتله شوف الشارع طالب تغيير، أنا في وشهم بقالي 20 سنة، مش هنغير حسني مبارك لكن نغير على الأقل الوزراء، شوفولهم منظر تاني”.
وأضاف غالي أنه بعد ذلك تلقى اتصالًا من الرئيس مبارك، قائلًا: “بعديها بشوية كلمني حسني مبارك قالي: إيه مش عاوز تيجي؟ قولتله: شوف يعني محتاجين تغيير، أنا في وشهم بقالي مدة، فإني أنا أتغير بدال ما أنت تتغير يا ريس وتكمل معانا”.
وتابع أنه عرض على مبارك الاستمرار في العمل معه ولكن بعيدًا عن منصب الوزير، قائلاً: “قولتله على العموم أنا مستعد أشتغل عندك زي ما أنت عاوز بس مش في شكل وزير، أجيلك مساعد أجيلك مستشار”.
وأضاف غالي تفاصيل الحوار قائلًا: “قالي معنديش مستشارين، قولتله أجيلك مساعد، قالي معنديش مساعدين، قولتله أجيلك فراش أجيبلك القهوة الصبح، قالي ما بشربش قهوة الصبح”.
واستطرد: “قولتله شوف سيادتك بتشرب إيه، هقول لميشيل مراتي تعملهولك وأجيبهولك الصبح، قالي لأ خلاص، أنت شوف لو مالقيتليش حد على بكرة الصبح الساعة 9 هطلع أمر عسكري بتكليفك بالوزارة، فضبط نفسك وشوف حد”.
وعن الشخص الذي اقترحه لتولي الوزارة، قال غالي: “فكلمني الساعة 12 بالليل أحمد شفيق قالي: إيه رأيك في سمير رضوان؟ قولتله: عظمة، راجل هايل”.
وأضاف: “قالي بيفهم؟ قولتله: بيفهم وهينفع واللي ما ينفعش بننفعه ونفهمه مش مشكلة خالص”.
وأوضح أنه بعد ذلك تواصل مع الرئيس مبارك قائلًا: “قفلت معاه وكلمت الريس كانت الساعة واحدة الصبح. قولتله: يا سيادة الريس لقينا حد.. مين؟ سمير رضوان”.
وتابع: “قولتله: ده راجل كان في منظمات دولية وبتاع وراجل عظيم بيفهم آه بيفهم واللي ما بيفهموش نفهمهوله.. وبس وخرجت منها”.