شهدت محافظة الإسماعيلية حادثًا مأساويًا أسفر عن سقوط عدد من الضحايا والمصابين، بعدما تعرضت سيارة كانت تقل عمالًا لحادث على الطريق. هذه الواقعة أعادت إلى الواجهة أزمة نقل العمال بوسائل غير مخصصة لنقل الأشخاص، وما تسببه هذه الممارسات من مخاطر تهدد حياة المواطنين.
وانتقدت الفنانة رانيا فريد شوقي ظاهرة نقل العمال داخل صناديق سيارات النقل، وذلك في منشور عبر حسابها على موقع التواصل الاجتماعي «فيسبوك»، حيث أعربت عن استيائها من استمرار هذه الممارسات رغم تطور شبكة الطرق ووجود قوانين للمرور وعقوبات للمخالفين.
وقالت رانيا فريد شوقي في منشورها: «إحنا في سنة 2026… ونفسي أفهم ليه لسه عندنا مشاهد العالم تجاوزها من سنين؟ يعني إيه عمال بيتنقلوا لشغلهم في صندوق عربية نقل؟ تفتكر إحساس العامل وهو رايح شغله بالطريقة دي إيه؟ وإحساسه بقيمته إيه، وهو بيتنقل في وسيلة مش معمولة أصلًا للبشر؟
والأغرب… إزاي عربية بالشكل ده تمشي على الطريق ومحدش يوقفها؟ فين الرقابة وفين تطبيق القانون؟
والسؤال الثاني: الحمد لله بقى عندنا شبكة طرق كبيرة وجيدة، وعندنا قانون مرور وعقوبات. زمان كنا بنرجع الحوادث للطرق المكسرة وعدم وجود قانون رادع… طب دلوقتي ليه لسه بنسيء استخدام الطرق ومش بنحترم قانون المرور؟
وحادث الإسماعيلية مش لازم ينتهي بانتهاء التحقيقات وتحديد المسؤول. الأهم: إيه اللي هيتغير بعده؟ هل هنمنع نقل العمال بالشكل ده؟ هل الرقابة هتزيد والقانون هيتطبق فعلًا؟ ولا بعد فترة هنشوف نفس الحادث… بضحايا جدد؟
رحم الله الضحايا وشفى المصابين وصبّر أهلهم. الطريق اتغيّر والقانون موجود… الباقي ضمير، ضمير ما يخالفش وضمير ما يسكتش على المخالفة.