بعثت شهد، الابنة الأكبر للفنان الراحل محمد مرزبان، الذي وافته المنية الأربعاء الماضي، برسالة إلى والدها، معبرة عن صدمتها برحيله وعدم تصديقها لوفاته.
وكتبت شهد عبر حسابها بموقع فيسبوك: “يا بابا عدى أسبوع من ساعة ما مشيت، ولسه مش قادرة أصدق إن دي الحقيقة. لسه مستنياك تدخل من الباب أو أسمع صوتك بتناديني. مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم واسمع نصايحك ليا و’صباح الفل يا شهوده’ عشان أصبّر نفسي”.
وأضافت شهد: “كل يوم بصحى من النوم بتمنى إنه يكون كابوس وإن مفيش حاجة حصلت وأشوفك تاني. كان نفسي تقوم بالسلامة وتشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة وحلوة احنا عشنا ولسه وهنفضل عايشين متشرفين إنك أبونا”.
وتابعت ابنة محمد مرزبان: “كان نفسي في حاجات كتير أوي لسه نعملها مع بعض؛ خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفرح Jessy وAhmed، وفطار يوم الجمعة بعد الصلاة، قعدتنا نتفرج علي فيلم ونتجمع نتفرج علي ماتش وحاجات كتير أوي”.
كل يوم ادعيلك وأحاول أكون نسخة تانية منك
وأكملت: “مشيت وسيبت فراغ كبير أوي قلبي واجعني يا بابا. بس أنا حلمت بيك واطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي. كان نفسي أقولك كل يوم إني بحبك. كان نفسي أحضنك وأبوسك كل يوم. كان نفسي أقولك كل يوم إنك أعظم أب في الدنيا.
بس أنا هفضل كل يوم ادعيلك وأحاول أكون نسخة تانية منك وأعمل الحاجات الحلوة والخير اللي كنت بتعملها، واربي عيالي انهم يبقي شبهك وزيك. بحبك اوي يا حبيبي يا روح قلبي. وان شاء الله نتقابل في الجنة. الله يرحمك يا حبيبي”.