في تعليق له على تصريحات محمد صلاح الأخيرة، أكد الإعلامي واللاعب السابق أحمد حسام ميدو إن التضحية اللي اتكلم عنها صلاح بتعكس التزامه الكبير بحياته الرياضية، سواء على المستوى البدني أو الشخصي.
ميدو أوضح عبر حسابه على منصة «إكس» إن اللاعب المحترف ممكن يكون عنده فلوس وشهرة، لكن بيختار إنه يلتزم بنظام غذائي معين، وينام بدري، ويشارك في المعسكرات التدريبية، ويبعد عن السهر والرفاهية، بالإضافة لتحمله ضغوط الجماهير والإعلام اللي بتطالبه بالفوز باستمرار.
كمان أضاف إن محمد صلاح اختار يكرّس حياته لكرة القدم، وده بان في مسيرته الناجحة، واعتبره مثال للاجتهاد والالتزام، وكمان دعم الناس القريبة منه، وده نموذج ممكن يستفيد منه الشباب المصري في تحقيق أهدافهم.
وحديثًا، تحدث محمد صلاح عن كواليس رحلته من مصر لأوروبا بعد ما انتهى مشواره مع ليفربول الإنجليزي في نهاية الموسم 2025-2026.
صلاح قال في تصريحات مصورة: «لما خرجت من مصر لأوروبا كان ضمن أحلامي إن الناس تحس إني حققت حاجة كويسة، وإنهم يشوفوا ده ويستفيدوا منه»
وأضاف: «ضحيت بشبابي، مفيش حاجة أكتر من كده، ممكن الناس ما شافتش ده لكن كان الموضوع صعب، خصوصًا إني ضحيت بلحظات شبابي وكثير عشان أظهر بشكل كويس وكنت بتدرب مرتين أو ثلاثة في اليوم»
وتابع: «الحمد لله إني قدرت أخليكم تعيشوا قصة خيالية، يمكن الناس ماكنوش متوقعين إنها ممكن تحصل، ولا أنا شخصيًا كنت متخيل ده»
واختتم: «بس عيشناها بأحسن طريقة ممكنة وفخور جدًا بذلك، وأتمنى إنه في المستقبل يكون فيه حد يحقق اللي حققته وأكتر من كده»