أكد ياسر إبراهيم، مدافع منتخب مصر، صعوبة مواجهة نيوزيلندا المقبلة في الجولة الثانية من منافسات المجموعة السابعة ببطولة كأس العالم 2026.
تصريحات ياسر إبراهيم
وقال ياسر إبراهيم في تصريحات تليفزيونية: “نيوزيلندا فرقة كويسة جدًا وعندها سرعات، ولعيبة أقوياء وكورتهم مختلفة، وإحنا دايمًا بنواجه مدارس مختلفة، والتلات منتخبات اللي هنلاعبهم مختلفين عن بعض، فأكيد هنشتغل عليهم كويس”.
وأضاف: “شوفت ماتش نيوزيلندا واتفرجت عليه، هما منتخب كويس جدًا، وعندهم سرعات وكورة هجومية كويسة أوي”.
وشدد مدافع منتخب مصر على أهمية احترام المنافس، قائلًا: “الماتشات دي تعملها حساب تفوز، تحترم الفرقة تفوز، مينفعش تستهون بأي منتخب أيًا كان اسمه، الكورة اتطورت على مستوى العالم، وحتى المنتخبات الأفريقية بقت قوية جدًا”.
وتابع: “إحنا كلاعيبة كبار دورنا نفهم اللعيبة إن الماتش مش سهل، في ناس بتقول هنلاعب نيوزيلندا فالدنيا بسيطة وسهلة، لكن إحنا بنتكلم مع بعض باستمرار وبنأكد إن الفرقة قوية ولعيبتها سريعة”.
وأشار ياسر إبراهيم إلى وجود تشابه بين نيوزيلندا وأحد المنتخبات التي واجهها الفراعنة مؤخرًا، موضحًا: “ماتش روسيا الودي اللي لعبناه، نيوزيلندا شبههم شوية، عندهم السرعة والقوة والمهارة ومميزين في الحاجات دي”.
واختتم تصريحاته قائلًا: “بيبان إن كورتهم سهلة في الباص وإنهم بيلاقوا بعض، لكن في الملعب الموضوع بيكون صعب جدًا وبيحتاج تركيز عالي”.