كشف إبراهيم حسن مدير منتخب مصر الأول لكرة القدم عن تفاصيل حديث حسام حسن المدير الفني لـ الفراعنة مع اللاعبين بين شوطي مباراة نيوزيلندا في الجولة الثانية عن المجموعة السابعة ببطولة كأس العالم 2026، والذي كان قد انتهى بتأخر منتخبنا بهدف دون رد وسط أداء باهت، ولكن الأمر تحول في الشوط الثاني وحقق منتخبنا الريمونتادا وانتصر بنتيجة 3-1، ما جعل الناس يتسائلون عن سر التغير وما قاله العميد لـ اللاعبين بين الشوطين.
تصريحات إبراهيم حسن
وقال إبراهيم حسن في تصريحات تليفزيونية: الحمد لله على المكسب طبعا ومينفعش يبقى في دور فني من غير دور إداري، والدور الفني مع التنظيمي هما سبب النجاح، الحمد لله بنكمل بعض وبنشتغل علشان اسم بلد زي مصر وشعب كبير واثق فينا، ولازم حساباتنا تبقى دقيقة ومفيهاش أخطاء، إحنا بنكمل بعض، لكن الدور الأول والأخير لحسام، ولازم كل واحد يكون ليه شخصيته ويقول كلمته، وأنا طبعًا موجود ولازم نكمل بعض.
وأضاف: بين الشوطين كان في صعوبة، وحسام كان بيحفز اللعيبة، وكان لازم أنا كمان أتكلم، قولنالهم مينفعش المصريين يرجعوا زعلانين، وكل واحد يراجع نفسه وينفذ المطلوب، واللي مش هيلتزم هيتغير ومش هيبقى موجود الشوط الثاني أيا كان مين حتى لو بعد خمس دقائق.
وأشار إبراهيم حسن في تصريحاته: حسام شرح كل حاجة بالتفصيل، وتحليل الأداء بيبقى واضح قدامنا، بنشوف الماتش على الشاشة وبنراجع الأخطاء، الكلام ده كله بيحصل بين الشوطين، والحمد لله درجة استيعاب اللعيبة كبيرة، وهم محترمين وبيطبقوا اللي بيتقال عليهم.
وأوضح: كابتن حسام قال للاعيبة: بعد إذنكم حسّوا بالشعب والناس اللي عايزة تفرح.. اللي عايز يلعب ويحس بالناس دي يتفضل، واللي مش قادر يقعد جنبي.
وأفاد إبراهيم حسن: الكلام كان طالع من القلب ولمس كل مواطن مصري، وكان ليه مفعول السحر على أداء المنتخب في الشوط التاني، وأول مرة نشوف المنتخب بالشكل ده، مديش أي فرصة للمنافس، ودي رجالة مصر بجد وقدرت تثبت نفسها.
وأتم: الرسالة كانت واضحة: صدق نفسك زي ما صدقنا نفسنا زمان في بطولات أمم إفريقيا.