كشف مصدر من نادي فاركو إن رامي صبري المدير الرياضي للفريق لسه مستمر في عمله ومش هاجر منصبه حتى الآن، وبيشتغل زي ما هو خلال الفترة الحالية.
المصدر قال في تصريحات خاصة لـ«أحداث اليوم» إن رامي صبري تلقى شوية عروض إدارية في الفترة الأخيرة، ولسه بيدرس مستقبله وما حسمش وجهته المقبلة لحد دلوقتي.
وأضاف إن قرار رحيله لو حصل هيكون بناءً على رغبته هو، خاصة إن فيه أندية مهتمة بالتعاقد معاه عشان يتولى مناصب إدارية في الموسم الجاي.
أحمد خطاب بعد هبوط فاركو لـ«أحداث اليوم»: كنت ببني فريق.. وهم هدموه في موسم واحد
أحمد خطاب المدير الفني السابق لفريق فاركو، رجع هبوط الفريق لدوري المحترفين لعدم التنظيم داخل النادي، مؤكدًا إن التفريط في عدد كبير من اللاعبين من غير خطة واضحة هو السبب الرئيسي في اللي حصل السنة دي.
خطاب قال في تصريحات خاصة لموقع «أحداث اليوم»: “هبوط فاركو لدوري المحترفين هو نتيجة طبيعية للفوضى اللي حصلت خلال موسم كامل، خصوصًا بعد التفريط في عناصر أساسية مهمة داخل الفريق”
وأضاف: “أنا توليت تدريب فاركو لمدة 3 مواسم، ولعبت أكتر من 100 مباراة بين الدوري والكأس وكأس الرابطة، وكنا ماشيين بشكل كويس رغم الإمكانيات المحدودة”
وأوضح مدرب فاركو السابق إن الصورة المتداولة عن النادي إنه عنده قدرات مالية ضخمة مش صحيحة، وقال: “فاركو مش عنده قدرات مادية كبيرة زي ما الناس فاكرة، وكنت معتمد على بيع اللاعبين بشكل محسوب مع الحفاظ على القوام الأساسي”
أحمد خطاب: ما حدث لفاركو ليس سوء حظ.. بل نتيجة قرارات كارثية
وتابع: “خلال 3 مواسم، وافقت على بيع 25 لاعب مقابل أكثر من 300 مليون جنيه، وفي نفس الوقت كنت معتمد على قطاع الشباب وأبناء النادي من غير ما أتعقد مع صفقات كتيرة”
انتقد خطاب اللي حصل في الموسم الحالي، مؤكدًا إن الإدارة فرطت في 16 لاعب دفعة واحدة من غير أي خطة واضحة، هل يعقل إنك تتنازل عن فريق كامل بدكة بدلاءه؟
كمان تكلم عن رحيله عن الفريق، قائلاً: “الإدارة قررت رحيلي بعد ما خسرت في 7 مباريات أمام كبار الدوري، رغم إنني حققت نتائج إيجابية أمام نفس الفرق في الدور الأول، بينما خسروا منهم في الدور الثاني، وكانت النتائج دي من أسباب الهبوط”
وشدد خطاب إنه مش هو بس اللي يتحمل مسؤولية تراجع النتائج، مضيفًا: “مش بقول إن رحيلي كان السبب الوحيد في الهبوط، لكن الاستقرار الفني بيعمل فرق، والدليل اللي حصل مع كهرباء الإسماعيلية”
«كهرباء الإسماعيلية تمسكوا برضا شحاتة فنجوا.. وفاركو رحلوني فهبطوا »
وأكمل: “كهرباء الإسماعيلية في بداية الموسم كان الكل متوقع هبوطه بسبب النتائج السلبية، لكن الإدارة تمسكت باستمرار رضا شحاتة، وحصدوا نتيجة القرار في النهاية بعدما وصل الفريق إلى 30 نقطة وأصبح قادرًا على البقاء”
هبوط الإسماعيلي كان متوقعًا
وعن هبوط الإسماعيلية، قال خطاب: “تاريخ الإسماعيلي كبير، لكن هبوطه كان متوقعًا منذ الموسم الماضي بسبب الأزمات المتراكمة، وإلغاء الهبوط وقتها تسبب في مشاكل الموسم الحالي”
وأضاف: “أنا ضد إلغاء الهبوط تمامًا هذا الموسم، ولو حصل هيكون الدورات الرمضانية أفضل من الدوري”
واختتم تصريحاته برسالة واضحة بشأن مستقبله التدريبي: “إذا طلب مني فاركو العودة للعمل معهم في دوري المحترفين فلن أوافق، ليس كرهًا في النادي، فهو بيتي وتحت أمره في أي وقت، لكنني لا أدرب في دوري المحترفين”